يا قلبي اهدأ… بقلم الشاعر احمد هلال

يا قلبي أهدا
بقلمي ( احمد هلال )
ـــــــــــــــــــــــــــــــــــــــــــــ
يا قلبي طب أهدا وأستنا
وسيبك م اللى خانك سيب
لا عمرك يوم هتتهنا
وطبعك فالهوى دا عجيب
أنا الطيبه بتوجعني
وطيبتك ف الزمن دا عيب
لا عمرك مره تراجعنى
تقولى كون فطين ولبيب
يا قلبي ما شوفت يوم راحه
ليلاتي الدمعه سراحه
وناس ف الحب مرتاحه
وأنا أبدا ما كان لى حبيب
وعمري مني متاخد
أنا ع الغدر مش واخد
وبوفي العهد لو أعاهد
ملاقي ل قلبي أى طبيب
وفاتح سكه للمحبوب
وبنسى منه أى عيوب
وف حبه لساني يدوب
ولو يطلب.. لبن العصفور
 أطير وأجيب
أشيله بين جفونى شيل
ولا فاض بيا يوم الكيل
 وعمرى ف يوم ماكِل وأميل
ياريته كان ل قلبي حبيب
لكنه خد على الأسوه
وقلبي عنده ولا يسوى
كمان الغدر.. له قدوه
وكأنه يعرف أمر الغيب
دا بكره يشوف عذاب ومرار
ويفضل ع الدوام محتار
يخلص لي ..عزيز جبار
وأنا هدعي وربي مجيب