نور هادى شاعر الفردوس يكتب قصيدة :- مرحبًا

نور هادى 

شاعر الفردوس

 

يكتب قصيدة :- مرحبًا 

,,,,,,,,,,,,,,,,,,,,,,,,,,,,

مرحبًا

(مرحبًا سعادة الحرامى)

ولسيادتك الصف الأولانى

مافيش تابور عيش بتقفه

مينتهيش

ولا سفينة مغرقانى

فى بِركة عميانى

ولا بَركة فلوس مقويَّانى

ولا جنِّى فى فانوس

ولا حلم فى كابوس

ولا دكان شحاته والهدمة

غير البرشامة والعتمة

ولا كورة ولا ناقد ولا مستكاوى

ولا زنقة ولا سكة مرحتهاش

ومافيش معاش فى البريد مجاش

ولا شوبير الحلقة مطلعهاش

ولا حركة معملهاش

ولا طلقة ولا رقة ولا زفة ولا بحة

ولا دقة ولا قُفة بودنين

يرفعوها اثنين

ولا لعبة ولا ثورة ولا آفة

ولا أفَّة ولا بخة ولا لفتة عين

ولا إخوان ولا خوَّان

ولا تجار لاعبين بالدين

مفلسين بالاحترام

ولا سرقة ولا شمه ولا إكراه

ولا إجبار ولا عضين ولا عزين

مشرقين مغربين شرقانين بالموت

والسكة وجمهورية زفتى وشبين بالكوم

بتستنى تعاكسه وتسبل له

والأهلى بيجيب جون

والزمالك بيزوم بالفِطْرة

والقُطرة والأرانب الوالدِين

والقَطرَة والرمش الكحيل مرسوم

وعلى الجبهة مدور ومعلوم

والحسد بالعين مقوَّر يعور

ومعدوم ومصدوم ومظلوم

والقنطرة والدكة والغُطرة والسُترة

والدبْكة والربكة والرقصة

والتعبانين والعيانيين والسهرانيين

والغلابة دول بيبى لولادِك دول

ودولة المهم ما بتقعد يوم

لولاكِ لماتوا ولارجعوا ولا استشهدوا

ولا مادوا ولا هاجوا ولا اتعدموا

تسلمى بزندِك وقطيفتك وشالك وفستانك

ورحالك وجوالك ونجعك الهاوى

وبقطفتك وثمارك وجُمَّارك وقهوة الصاوى

وقفطانك وجلبيتك وبمعدنك الأصيل يا بلدى

وبمعولك لِهُدَّامِك اهدمى قُدامِك فى جلدى

وكسرى عصيانك ويسلمولى عميانك

وخدمينك وطمعينك بينتحروا علشانك

ولا بتتهافت عليك الأغانى

والمجلس أيه ؟؟؟ فطيس وبيرجع تانى !!

البدلة لابسها مزيناك بالضاوى

والأوبرا داخلها ومحليَّاك يا حاوى

والسينما عابرها ومخليَّاك جذر وتقاوى

والمزاج العالى والجيب يبقى خاوى

والحبيب متقلشى حتة سكرة

ولا خالد الصاوى

اسم الله ولا مغنواتى

حديدك سالخنا

وجديدك قاهرنا

وافلامك عارضها وعارضنا

وبلحمتك واجعنا

وبكلامك لافف قلوبنا

بمواجع عيوبنا

وشُرْبنا الكيف يوماتى

مخليك فى العلالى

سُبكى بتلالى

ولما منعنا الزيف

لقينا الثورة بتنادى

مرحبا تعالَى لسعادتك الصف الأمامى

والمقعد الأوحد والكرسى القدمانى

والمطلع الأمجد الوثير

والمشهد الاخير المثير

ومن غير بشكير

تكون النهاية مخاوية دايما للبداية

مخالفة للطباع

ما إحنا خلاص بقينا ضباع

ومافيش ثعالب ولا ذئاب

والله يرحم الأرانب

والقالب اللى تحت الراس انداس

وادشدش معاه صلات الرحم والفاس

ما خرمت الراس واللباس والدشداش

وربى يستر على ولاد الناس .

........................................

نور هادى 

شاعر الفردوس