هتخسر ايه لما تجرب
..........................
هتخسر ايه لما تجرب
حاول و قرب
جواك شيطان بيخوفك
بيقولك الناس هتكسفك
تعالى و اقعد وسطينا
و هتبقى درجة و اتخطينا
و شوف البركة لك و لينا
لما كلنا فى مكان واحد اتحطينا
و النفس مدفى المكان
لا محتاجين دفايه و لا سخان
و البركة فى كل المكان
و اتحداك لو حد فينا خان
حلوة الحياة لما يكون الغنى مع الفقير
بيشرب من مية القلة و مية الزير
حلو الحياة و فلة لما تكون يا وزير
طول النهار فى الشارع مع الجماهير
لما يكون الرئيس فى الشارع و فى البيوت
و لو كل يوم نص ساعة على الناس يفوت
يمكن يسعف واحد قبل ما يموت
يمكن يسعد واحد و هو بيفوت
تعالى و الله العظيم بنحبك
و لا نقدر فى يوم على بُعدك
تعالى و نضف لينا قلبك
و خليك دايمًا عند وعدك
دا احنا أهلك و دى بنتك و ده ابنك
و ما تعشى أبدَا لوحدك
..........................
محمد أبو المعاطى
Aucun commentaire:
Enregistrer un commentaire